Das Jahr hend miär ä sehr schenä Rütlitag verwitscht. Scho an Mändig bim Iirichtä hend miär trochänä Bodä und agnämi Temperatuirä mit liächtem Föhn guäti Bedingigä fürs Uifrichtä gha.
Am Mittwuch vor Martini simmer z`Beggeried mit äm Schiff gägem Rütli gschtartet. Ai dr Schiffsfiärer hed sehr genai uifpasst, das kei Rumpler oder ä falschä Hebel das Schiff inä falschi Richtig länkt. Scho am halbi Sibni im Rütli aacho, sind alli gägem Rütliplatz, teils mit schwärä Ruckseck und Material underem Arm duruifgschlorpäd.
Dobä acho, isch ä intensivi Aktivität mit Platzsuächä, Tischli uifstellä und Feyrlimachä im Gang. Bi eys im Horscht isch scho fascht alles parad. S`Kaffeefeyrli leychted cheibä schen i dä weichendä Morgädämmerig, das heisst, dass dr Toni alles iigrichtet hed.
Wärendem wart ich im Rütlibüro uf diä uisstehendi Schiässkrtä für ä Koni, da er sich churzfrischtig für ä Teilnahm aagmäldet hed. Äs hed meini Närvä scho ä chley schtrapaziert, bis alles klaped hed. Wärendessä isch s`Schiässä losgangä und diä meischtä hend nurnu Aigä für Kollegä wo schiässid. Am haubi Elfi hend alli Obmänner dr obligati Träff im Zelt, wo diä bekanntä Resultat diskutiärt wärdit. Vielleicht längzg am eintä oder andärä für ä Bächer oder Verzichtschein und gits Meischterbächer Aawärter.
Gley nach nachem verschpätetä Schiässschluss weiss ich,dass dr Urs dr Bächer um 1 Pt. verpasst hed, cheibä schad. Nach dr 19. Ablesig wär dä Traim nu möglich gsi. Diä nächschti Uifgab hani mit äm Murer Erich. Dä isch eifach nid z`gfindä, obwohl d`Lisbeth als Tagefähnrich scho lang mit dr Standartä wartet. Doch churz vor dr Schützägmeind taucht er doch nu uif, bereit dr Kopfkranz 50 Jahr Rütlischütz uifsetzä. Härztlichi Gratulation.
13 Buochser Rütlischitzä sind gmäldet und wend diä 15 Schuss möglichscht im Feyfi oder noch dra platziärä.
Eps ächt allnä gratä isch? I dä erschtä Ablesig probiärts dr Thomas, 74 Pt. jä das isch knapp für nä Verzichtschein. Aber i dä 2. Ablesig häscheräts mit Feyfi. Eysä Presi macht mit 82 Pt. äs Super Resultat, bravo. Druifnachä wett dr Tobias sicher ay äs guäts Resultat machä. Är isch guät uf Kurs, aber was isch da los? Nach 4 x 5, 1x 4 chund ä Nuller, das isch hert zum näh, wemä denu 78 Pt. macht. Ai anderi gsend dä Nullerkellä schwänkä, da isch nid alles richtig gangä. Dr Stefan macht mid 75 Pt. dä lang ersehnti Verzichtschein. Dr Urs hed leider mit 74 Pt. dr Bächer um 1 Pt. verpasst. Hoffentlich längts de s`nächschtimal. Ai dr Max und muäss ä Nuller la schreybä und macht 73 Pt. diä anderä Buochser hend leider nid uber 70 Pt. erreicht, diä chamä uf dr Ranglischtä nachäluägä.
Und jetzt hani äs Kaffee im Horscht verdiänät. Äs isch chuim zum glaibä, weviel Leut da obä Platz hend. Ä Zeyt lang sind alli Kaffeebeckli im bruicht wordä. Eysi Kaffee Fraiä, Anni und Anita chend fascht nimmä servierä, Fuäss a Fuäss stand diä Schitzä und plagiärid und analisiärid diä Tagesresultat. Einä hilft spontan Beckli abwäschä, ä andärä packt nu seini Wirscht uis, will eysä Chäs und Wirscht uifbruicht isch. Das isch äbä dr Rütligeischt.
Ä grossäs Dankäschen eysnä zwe Fraiä und am Toni Zimmermann, das isch eifach gewaltig, wiä sie das machid. Scho gly packid alli ihri Sachä zämä und machid sich bereit für dä Heiwäg mit äm Schiff, aber vorhär gits nu äs Kaffee. Mid guätä Erinnerigä aber scho ä chley miäd schliässid miä dä Rütlitag mit Nachtässä im Hirschä ab und machid ä churzä Rückblick uf dä vergangnig Tag.
Obmann Toni Barmettler
